ਸਿੱਖਾਂ ਵਿਰੁੱਧ ਕੂੜ ਪ੍ਰਚਾਰ ਤੋਂ ਸ਼ਿਵ ਸੈਨਾ ਬਾਜ ਆਵੇ:ਬਾਬਾ ਬਲਬੀਰ ਸਿੰਘ ਅਕਾਲੀ

ਪਟਿਆਲਾ, 30 ਅਪ੍ਰੈਲ (ਮਧੂਸਾਰ ਬਿਊਰੋ) -ਸਥਾਨਕ ਸ਼ਹਿਰ ਅੰਦਰ ਜੋ ਤਨਾਅ ਤੇ ਆਮ ਸ਼ਹਿਰੀ ਲਈ ਚਿੰਤਾ ਦਾ ਸਬੱਬ ਬਣਿਆ ਰਿਹਾ ਮਾਹੌਲ, ਤੇ ਚਿੰਤਾ ਵਿਅਕਤ ਕਰਦਿਆਂ ਨਿਹੰਗ ਸਿੰਘਾਂ ਦੀ ਸਿਰਮੌਰ ਸੰਸਥਾ ਬੁੱਢਾ ਦਲ਼ ਦੇ ਮੁਖੀ ਬਾਬਾ ਬਲਬੀਰ ਸਿੰਘ 96 ਕਰੋੜੀ ਨੇ ਕਿਹਾ ਕਿ ਸਿਵ ਸੈਨਾ ਦੇ ਅਖੌਤੀ ਕਥਿਤ ਆਗੂ ਵਲੋਂ ਸ਼ਹਿਰ ਦੇ ਮਾਹੌਲ ਨੂੰ ਫਿਰਕੂ ਰੰਗ ਦੇਣ ਦੀ ਅਸਫਲ ਕੋਸ਼ਿਸ਼ ਕੀਤੀ ਗਈ ਹੈ।ਜਿਸ ਨੀਯਤ ਨਾਲ ਸਾਂਤਮਈ ਮਾਹੌਲ ਨੂੰ ਵਿਗਾੜਨ ਦਾ ਜਤਨ ਕੀਤਾ ਗਿਆ ਹੈ ਉਸ ਦੀ ਚੌਫਿਰਿਓ ਡੱਟਵੀ ਨਿੰਦਾ ਨਿਖੇਧੀ ਹੋਣੀ ਚਾਹੀਦੀ ਹੈ ਅਤੇ ਸਬੰਧਤ ਸਿਵਸੈਨਾ ਆਗੂ ਨੂੰ ਨੱਥ ਪਾਉਣ ਲਈ ਸਖਤ ਤੋਂ ਸਖਤ ਕਾਨੂੰਨੀ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ।

ਸ਼੍ਰੋਮਣੀ ਪੰਥ ਅਕਾਲੀ ਬੁੱਢਾ ਦਲ ਪੰਜਵਾਂ ਤਖਤ ਚਲਦਾ ਵਹੀਰ ਚੱਕ੍ਰਵਰਤੀ ਦੇ ਮੁਖੀ ਸ਼੍ਰੋਮਣੀ ਸੇਵਾ ਰਤਨ, ਸ਼੍ਰੋਮਣੀ ਪੰਥ ਰਤਨ, ਸਿੰਘ ਸਾਹਿਬ ਜਥੇਦਾਰ ਬਾਬਾ ਬਲਬੀਰ ਸਿੰਘ ਅਕਾਲੀ 96 ਕਰੋੜੀ ਨੇ ਸਮੁੱਚੇ ਪੰਜਾਬ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਮਨ ਕਾਨੂੰਨ ਦੀ ਅਵਸਥਾ ਹਰ ਕੀਮਤ ਤੇ ਬਨਾਈ ਰੱਖਣ ਅਤੇ ਸਾਂਤੀ, ਭਾਈਚਾਰਕ ਸਾਂਝ, ਸਦਭਾਵਨਾ ਨੂੰ ਬਰਕਰਾਰ ਰੱਖਦੇ ਹੋਏ ਅਮਨਸਾਂਤੀ ਦੇ ਪਹਿਰ ਤੇ ਮਜਬੂਤੀ ਨਾਲ ਪਹਿਰਾ ਦੇਣ।ਉਨ੍ਹਾਂ ਕਿਹਾ ਕਿ ਅਸੀਂ ਸਮਝਦੇ ਹਾਂ ਕਿ ਇੱਕ ਡੂੰਘੀ ਸਾਜਿਸ ਤਹਿਤ ਅਮਨ ਸਾਂਤੀ ਦੇ ਮਹੌਲ ‘ਚ ਘੁੱਗ ਵਸਦੇ ਸ਼ਹਿਰ ਨੂੰ ਭੰਗ ਕਰਨ ਦੀ ਚਾਲ ਚਲੀ ਗਈ ਹੈ ਜੋ ਅਤਿ ਨਿੰਦਣਯੋਗ ਤੇ ਘਟੀਆ ਪੱਧਰ ਦੀ ਕਾਰਵਾਈ ਹੈ।ਰਲ ਮਿਲ ਕੇ ਸਿੱਖ ਆਗੂਆਂ, ਸ਼ਹਿਰ ਵਾਸੀਆਂ ਦੇ ਸਹਿਯੋਗ ਨਾਲ ਸਮੁੱਚੇ ਹਲਾਤਾਂ ਨੂੰ ਦੂਰ ਅੰਦੇਸੀ ਨਾਲ ਪ੍ਰਸ਼ਾਸਨ ਨੇ ਕਾਬੂ ਕੀਤਾ ਹੈ, ਪੰਜਾਬ ਸਰਕਾਰ ਵਲੋਂ ਫੋਰੀ ਲਏ ਗਏ ਫੈਸਲੇ ਨੇ ਪ੍ਰਸ਼ਾਸਨ ਨੂੰ ਹੱਲਾਸ਼ੇਰੀ ਦਿੱਤੀ ਹੈ।ਉਨ੍ਹਾਂ ਕਿਹਾ ਕਿ ਸਿਵਸੈਨਾ ਕੂੜ ਪ੍ਰਚਾਰ ਤੋਂ ਬਾਜ਼ ਆਵੇ ਤੇ ਸਰਕਾਰ ਇਨ੍ਹਾਂ ਨੂੰ ਸਿਰ ਚੁੱਕਣ ਤੋਂ ਪਹਿਲਾਂ ਨੱਥ ਪਾਵੇ।ਨਹੀਂ ਤਾਂ ਅਜਿਹੇ ਹਲਾਤਾਂ ਲਈ ਸਿੱਧੇ ਰੂਪ ਵਿੱਚ ਸਰਕਾਰਾਂ ਹੀ ਜ਼ਿੰਮੇਵਾਰ ਹੁੰਦੀਆਂ ਹਨ।ਉਨ੍ਹਾਂ ਕਿਹਾ ਕਿ ਸਿਵਸੈਨਾ ਦੇ ਕਥਿਤ ਆਗੂ ਵਲੋਂ ਵਾਪਰੇ ਘਟਨਾ ਕ੍ਰਮ ਨਾਲ ਹਰ ਸ਼ਹਿਰੀ ਦਾ ਹਿਰਦਾ ਦੁਖੀ ਹੋਇਆ ਹੈ।