ਦਿੱਲੀ ਹਾਈ ਕੋਰਟ ਦੇ 2 ਨਵੇਂ ਜੱਜਾਂ ਨੇ ਅਹੁਦੇ ਦੀ ਚੁੱਕੀ ਸਹੁੰ
ਨਵੀਂ ਦਿੱਲੀ (ਮਧੂਸਾਰ ਬਿਊਰੋ) ਦਿੱਲੀ ਹਾਈ ਕੋਰਟ ਦੇ 2 ਨਵੇਂ ਜੱਜਾਂ ਨੇ ਸੋਮਵਾਰ ਨੂੰ ਅਹੁਦੇ ਦੀ ਸਹੁੰ ਚੁਕੀ, ਜਿਸ ਨਾਲ ਅਦਾਲਤ ‘ਚ ਕੁੱਲ ਜੱਜਂ ਦੀ ਗਿਣਤੀ 35 ਹੋ ਗਈ ਹੈ। ਕਾਰਜਵਾਹਕ ਚੀਫ਼ ਜੱਜ ਵਿਪਿਨ ਸਾਂਘੀ ਨੇ ਜੱਜ ਪੂਨਮ ਏ. ਬੰਬਾ ਅਤੇ ਜੱਜ ਸਵਰਨ ਕਾਂਤਾ ਸ਼ਰਮਾ ਨੂੰ ਅਹੁਦੇ ਦੀ ਸਹੁੰ ਚੁਕਾਈ, ਜਿਨ੍ਹਾਂ ਨੂੰ ਇਸ ਮਹੀਨੇ ਦੀ ਸ਼ੁਰੂਆਤ ‘ਚ ਦਿੱਲੀ ਹਾਈ ਕੋਰਟ ਦੇ ਜੱਜ ਦੇ ਰੂਪ ‘ਚ ਨਿਯੁਕਤ ਕੀਤਾ ਗਿਆ ਸੀ।
ਸਹੁੰ ਚੁੱਕ ਸਮਾਰੋਹ ਮੁੱਖ ਜੱਜ ਦੀ ਅਦਾਲਤ ‘ਚ ਹੋਇਆ, ਜਿਸ ‘ਚ ਹਾਈ ਕੋਰਟ ਦੇ ਹੋਰ ਜੱਜ, ਵਕੀਲ ਅਤੇ ਸਹੁੰ ਲੈਣ ਵਾਲੇ ਨਵੇਂ ਜੱਜਾਂ ਦੇ ਪਰਿਵਾਰ ਦੇ ਮੈਂਬਰ ਮੌਜੂਦ ਸਨ। ਸੁਪਰੀਮ ਕੋਰਟ ਦੇ ਕੋਲੇਜੀਅਮ ਨੇ ਇਕ ਫਰਵਰੀ ਨੂੰ ਹੋਈ ਆਪਣੀ ਬੈਠਕ ‘ਚ ਜੱਜ ਬੰਬਾ ਅਤੇ ਜੱਜ ਸ਼ਰਮਾ ਨੂੰ ਤਰੱਕੀ ਦੇਣ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦਿੱਤੀ ਸੀ, ਜੋ ਦਿੱਲੀ ਹਾਈ ਕੋਰਟ ‘ਚ ਨਿਆਇਕ ਅਧਿਕਾਰੀ ਦੇ ਰੂਪ ‘ਚ ਤਾਇਨਾਤ ਸਨ। ਨਵੀਆਂ ਨਿਯੁਕਤੀਆਂ ਦੇ ਨਾਲ ਦਿੱਲੀ ਹਾਈ ਕੋਰਟ ‘ਚ ਜੱਜਾਂ ਦੀ ਗਿਣਤੀ 35 ਹੋ ਗਈ ਹੈ, ਜਿਸ ‘ਚ 9 ਮਹਿਲਾ ਜੱਜ ਸ਼ਾਮਲ ਹਨ। ਦਿੱਲੀ ਹਾਈ ਕੋਰਟ ‘ਚ ਜੱਜਾਂ ਦੀ ਮਨਜ਼ੂਰ ਗਿਣਤੀ 60 ਹੈ।
