ਮਾਨਯੋਗ ਜਸਟਿਸ ਸੰਤ ਪ੍ਰਕਾਸ਼ ਨੇ SGGS ਵਰਲਡ ਯੂਨੀਵਰਸਿਟੀ ਦਾ ਕੀਤਾ ਦੌਰਾ

ਫਤਹਿਗੜ੍ਹ ਸਾਹਿਬ (ਅਮਰੀਕਇੰਦਰ ਸਿੰਘ/ਮਧੂਸਾਰ ਬਿਊਰੋ) ਯੂਨੀਵਰਸਿਟੀ ਸਕੂਲ ਆਫ਼ ਲਾਅ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਰਲਡ ਯੂਨੀਵਰਸਿਟੀ, ਫਤਹਿਗੜ੍ਹ ਸਾਹਿਬ ਵੱਲੋਂ “ਕਾਨੂੰਨੀ ਪੇਸ਼ਾ ਅਤੇ ਨੈਤਿਕਤਾ” ਵਿਸ਼ੇ ‘ਤੇ ਇਕ ਐਕਸਟੈਨਸ਼ਨ ਲੈਕਚਰ ਦਾ ਆਯੋਜਨ ਕੀਤਾ ਗਿਆ। ਇਸ ਮੌਕੇ ਮੁੱਖ ਬੁਲਾਰੇ ਵਜੋਂ ਮਾਨਯੋਗ ਜਸਟਿਸ ਸੰਤ ਪ੍ਰਕਾਸ਼, ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਚੰਡੀਗੜ੍ਹ ਨੇ ਸ਼ਿਰਕਤ ਕੀਤੀ। ਉਹਨਾਂ ਨੇ ਵਕੀਲਾਂ ਲਈ ਪੇਸ਼ੇਵਰ ਨੈਤਿਕਤਾ ਦੇ ਵੱਖ-ਵੱਖ ਪਹਿਲੂਆਂ ਬਾਰੇ ਵਿਸਥਾਰ ਨਾਲ ਚਰਚਾ ਕੀਤੀ ਅਤੇ ਵਿਸ਼ੇਸ਼ ਤੌਰ ‘ਤੇ ਕਾਨੂੰਨੀ ਪੇਸ਼ੇ ਅਤੇ ਨੈਤਿਕਤਾ ਨਾਲ ਸੰਬੰਧਤ ਐਡਵੋਕੇਟਸ ਐਕਟ, 1961 ਦੀਆਂ ਵੱਖ-ਵੱਖ ਧਾਰਾਵਾਂ ਦਾ ਹਵਾਲਾ ਦਿੱਤਾ। ਉਹਨਾਂ ਨੇ ਵਕੀਲਾਂ ਦੇ ਪੇਸ਼ੇਵਰ ਆਚਰਣ ਨਾਲ ਸੰਬੰਧਤ ਬਾਰ ਕੌਂਸਲ ਆਫ਼ ਇੰਡੀਆ ਦੇ ਨਿਯਮਾਂ ਦਾ ਵੀ ਹਵਾਲਾ ਦਿੱਤਾ। ਅਦਾਲਤ ਦੇ ਪ੍ਰਤੀ ਵਕੀਲ ਦੀ ਡਿਊਟੀ ਅਤੇ ਨਿਯਮਾਂ ਬਾਰੇ ਉਦਾਹਰਨ ਦੇਂਦਿਆਂ ਉਹਨਾਂ ਮਾਣ ਨਾਲ ਕੰਮ ਕਰਨਾ, ਅਦਾਲਤ ਦਾ ਸਤਿਕਾਰ ਕਰਨਾ, ਨਿੱਜੀ ਤੌਰ ‘ਤੇ ਕੋਈ ਸੰਚਾਰ ਨਹੀਂ ਕਰਨਾ, ਅਭਿਆਸ ਦੇ ਕਿਸੇ ਵੀ ਅਨੁਚਿਤ ਸਾਧਨ ‘ਤੇ ਜ਼ੋਰ ਦੇਣ ਵਾਲੇ ਗਾਹਕ ਦੀ ਨੁਮਾਇੰਦਗੀ ਕਰਨ ਤੋਂ ਇਨਕਾਰ, ਸਹੀ ਪਹਿਰਾਵੇ ਦੇ ਕੋਡ ਵਿੱਚ ਪੇਸ਼ ਹੋਣਾ ਆਦਿ ਦੇਬਾਰੇ ਚਰਚਾ ਕੀਤੀ।

ਲੈਕਚਰ ਵਿੱਚ ਮਾਣਯੋਗ ਪ੍ਰੋ-ਚਾਂਸਲਰ ਪ੍ਰੋ.(ਡਾ.) ਅਜਾਇਬ ਸਿੰਘ ਬਰਾੜ, ਮਾਨਯੋਗ ਵਾਈਸ ਚਾਂਸਲਰ ਡਾ. ਪ੍ਰਿਤ ਪਾਲ ਸਿੰਘ, ਸਮੂਹ ਫੈਕਲਟੀ ਮੈਂਬਰ ਅਤੇ ਵਿਦਿਆਰਥੀ ਹਾਜ਼ਰ ਸਨ। ਵਿਭਾਗ ਦੇ ਮੁਖੀ ਪ੍ਰੋ: (ਡਾ.) ਪਰਮ ਜੀਤ ਸਿੰਘ ਨੇ ਮੁੱਖ ਬੁਲਾਰੇ ਮਾਨਯੋਗ ਜਸਟਿਸ ਸੰਤ ਪ੍ਰਕਾਸ਼ ਅਤੇ ਖਾਸ ਮਹਿਮਾਨ ਡਾ. ਵੀ.ਕੇ. ਬਾਂਸਲ, ਪ੍ਰੋ: ਐਮਰੀਟਸ, ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ, ਅਤੇ ਹੋਰ ਪਤਵੰਤਿਆਂ ਦਾ ਸਵਾਗਤ ਕੀਤਾ। ਉਹਨਾਂ ਜੀਵਨ ਵਿੱਚ ਨੈਤਿਕ ਕਦਰਾਂ-ਕੀਮਤਾਂ ਦੀ ਮਹੱਤਤਾ ਬਾਰੇ ਸੰਖੇਪ ਵਿੱਚ ਚਰਚਾ ਕੀਤੀ। ਉਹਨਾਂ ਨੇ ਐਡਵੋਕੇਟਸ ਐਕਟ, 1961 ਅਤੇ ਬਾਰ ਕੌਂਸਲ ਨਿਯਮਾਂ ਵਿੱਚ ਦਰਜ ਕੁਝ ਨੈਤਿਕ ਨਿਯਮਾਂ ਦਾ ਹਵਾਲਾ ਦਿੱਤਾ। ਅੰਤ ਵਿੱਚ ਵਿਭਾਗ ਇੰਚਾਰਜ ਸ਼੍ਰੀਮਤੀ ਨਵਨੀਤ ਕੌਰ ਨੇ ਆਏ ਹੋਏ ਸਾਰੇ ਪਤਵੰਤਿਆਂ ਅਤੇ ਵਿਦਿਆਰਥੀਆਂ ਦਾ ਧੰਨਵਾਦ ਕੀਤਾ।