ਖ਼ਾਲਸਾ ਕਾਲਜ ਪਟਿਆਲਾ ਵਿਖੇ ਲਗਾਈ ਗਈ ਹਸਤਕਾਰੀ ਪ੍ਰਦਰਸ਼ਨੀ
ਪਟਿਆਲਾ (ਅਮਰੀਕਇੰਦਰ ਸਿੰਘ/ਮਧੂਸਾਰ ਬਿਊਰੋ) ਖ਼ਾਲਸਾ ਕਾਲਜ ਪਟਿਆਲਾ ਦੇ ਪੋਸਟ ਗ੍ਰੈਜੂਏਟ ਫੈਸ਼ਨ ਡਿਜ਼ਾਈਨਿੰਗ ਅਤੇ ਹੋਮ ਸਾਇੰਸ ਵਿਭਾਗ ਵੱਲੋਂ ਅੱਜ ਕਾਲਜ ਵਿਖੇ ਸਾਲਾਨਾ ਪ੍ਰਦਰਸ਼ਨੀ ਕਮ ਸੇਲ ਦਾ ਆਯੋਜਨ ਕੀਤਾ ਗਿਆ। ਇਸ ਪ੍ਰਦਰਸ਼ਨੀ ਦਾ ਉਦਘਾਟਨ ਕਾਲਜ ਦੇ ਪਿ੍ਰੰਸੀਪਲ ਡਾ: ਧਰਮਿੰਦਰ ਸਿੰਘ ਉੱਭਾ ਨੇ ਕੀਤਾ ਅਤੇ ਡਾ. ਸਵਰਨਜੀਤ ਕੌਰ, ਲੈਕਚਰਾਰ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਸਰਹਿੰਦ ਮੰਡੀ ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਇਸ ਮੌਕੇ ਡਾ. ਸਵਰਨਜੀਤ ਕੌਰ ਨੇ ਪ੍ਰਦਰਸ਼ਿਤ ਕੀਤੇ ਗਏ ਵੱਖ-ਵੱਖ ਕਲਾ ਨਮੂਨਿਆਂ ਦੀ ਸਲਾਘਾ ਕਰਦੇ ਹੋਏ ਕਿਹਾ ਕਿ ਕੁਝ ਨਮੂਨੇ ਤਾਂ ਕਲਾ ਦਾ ਬਹੁਤ ਹੀ ਬਿਹਤਰੀਨ ਨਮੂਨਾ ਹਨ। ਉਨਾਂ ਇਹ ਵੀ ਕਿਹਾ ਕਿ ਜੇਕਰ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਦੇ ਇਸ ਉੱਦਮ ਨੂੰ ਬਾਜ਼ਾਰ ਦੀਆਂ ਲੋੜਾਂ ਅਨੁਸਾਰ ਢਾਲ ਕੇ ਪੇਸ਼ ਕੀਤਾ ਜਾਵੇ ਤਾਂ ਇਹ ਰੁਜ਼ਗਾਰ ਦਾ ਇੱਕ ਚੰਗਾ ਮੌਕਾ ਹੋਵੇਗਾ। ਪ੍ਰਦਰਸ਼ਨੀ ਦੀ ਵਿਸ਼ੇਸ਼ਤਾ ਭਾਰਤ ਦੇ ਵੱਖ-ਵੱਖ ਰਾਜਾਂ ਦੀ ਹਸਤਕਾਰੀ ਕਲਾ ਦੀ ਨੁਮਾਇਦਗੀ ਕਰਦੇ ਵੱਖ ਵੱਖ ਵੰਨਗੀਆਂ ਦੇ ਜਿਵੇਂ ਕਿ ਫੁਲਕਾਰੀ, ਚਿਕਨਕਾਰੀ, ਕੰਥਾ ਅਤੇ ਕੱਛ ਦੀ ਕਢਾਈ ਦੀ ਵਰਤੋਂ ਵਾਲੇ ਹੱਥਾਂ ਦੀ ਕਢਾਈ ਵਾਲੇ ਸੂਟ ਸਨ । ਪ੍ਰਦਰਸ਼ਨੀ ਵਿੱਚ ਪ੍ਰਦਰਸ਼ਿਤ ਕੀਤੀਆਂ ਗਈਆਂ ਹੋਰ ਵਸਤੂਆਂ ਵਿੱਚ ਟਾਈ ਅਤੇ ਡਾਈ ਵਰਗੀਆਂ ਪਿ੍ਰੰਟਿੰਗ ਦੀਆਂ ਵੱਖ-ਵੱਖ ਤਕਨੀਕਾਂ ਦੁਆਰਾ ਤਿਆਰ ਕੀਤੇ ਗਏ ਟੇਬਲ ਲਿਨਨ ਅਤੇ ਬੈੱਡ ਲਿਨਨ, ਸਕਰੀਨ, ਸਟੈਨਸਿਲ ਅਤੇ ਬਲਾਕ ਪਿ੍ਰੰਟਿੰਗ ਆਦਿ ਸਨ।
ਦਰਸ਼ਕਾਂ ਦੀ ਖਿੱਚ ਦਾ ਕੇਂਦਰ ਫੇਂਗਸ਼ੂਈ ਕਲਾ ਦੀਆਂ ਵਸਤੂਆਂ ਜਿਵੇਂ ਕਿ ਸਜਾਵਟੀ ਕੱਪ, ਕੰਧ ਦੇ ਹੈਂਗਿੰਗ, ਕੋਸਟਰ, ਕੀਰਿੰਗਜ਼, ਬੁੱਕਮਾਰਕਸ ਆਦਿ ਰਹੀਆਂ । ਨੌਜਵਾਨਾਂ ਦੀ ਫੈਂਸੀ ਗਹਿਣਿਆਂ ਪ੍ਰਤੀ ਖਿੱਚ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਵੱਖ-ਵੱਖ ਹੱਥਾਂ ਨਾਲ ਬਣੇ ਗਹਿਣਿਆਂ ਦੇ ਸਮਾਨ ਜਿਵੇਂ ਕਿ ਮੁੰਦਰਾ, ਹਾਰ, ਚੂੜੀਆਂ, ਚਮਚਿਆਂ ਆਦਿ ਦੀ ਵੀ ਪ੍ਰਦਰਸ਼ਨੀ ਲਗਾਈ ਗਈ। ਹੇਅਰ ਐਕਸੈਸਰੀਜ਼, ਕਢਾਈ ਵਾਲੇ ਕੱਪੜੇ ਦੇ ਬੈਗ, ਥੀਮੈਟਿਕ ਕਢਾਈ ਦੇ ਹੂਪਸ, ਕਢਾਈ ਵਾਲੇ ਪੋਟਾਲਿਸ ਵੀ ਖਿੱਚ ਦਾ ਕੇਂਦਰ ਰਹੇ। ਕਾਲਜ ਪਿ੍ਰੰਸੀਪਲ ਡਾ. ਧਰਮਿੰਦਰ ਸਿੰਘ ਉੱਭਾ ਨੇ ਇਸ ਮੌਕੇ ਦੱਸਿਆ ਕਿ ਅਜਿਹੀਆਂ ਪ੍ਰਦਰਸ਼ਨੀਆਂ ਆਯੋਜਨ ਕਰਨ ਦਾ ਮੁੱਖ ਉਦੇਸ਼ ਵਿਦਿਆਰਥੀਆਂ ਵਿੱਚ ਸਵੈ-ਰੁਜ਼ਗਾਰ ਦੇ ਹੁਨਰ ਨੂੰ ਵਿਕਸਤ ਕਰਨਾ ਹੈ ਤਾਂ ਜੋ ਉਹ ਹਸਤਕਾਰੀ ਵਿੱਚ ਨਿਪੁੰਨਤਾ ਹਾਸਿਲ ਕਰਕੇ ਆਪਣੀ ਕਮਾਈ ਦੇ ਸਾਧਨ ਪੈਦਾ ਕਰ ਸਕਣ। ਵਿਭਾਗ ਦੇ ਮੁਖੀ ਡਾ: ਬਲਬੀਰ ਕੌਰ ਨੇ ਕਾਲਜ ਦੇ ਪਿ੍ਰੰਸੀਪਲ ਡਾ: ਧਰਮਿੰਦਰ ਸਿੰਘ ਉੱਭਾ ਵਲੋਂ ਵਿਭਾਗ ਨੂੰ ਪ੍ਰੇਰਿਤ ਕਰਨ ਅਤੇ ਸਹਿਯੋਗ ਦੇਣ ਲਈ ਸਨਮਾਨਿਤ ਕੀਤਾ। ਕਾਲਜ ਦੇ ਡਿਪਟੀ ਪਿ੍ਰੰਸੀਪਲ ਡਾ: ਜਸਲੀਨ ਕੌਰ ਨੇ ਵਿਦਿਆਰਥੀਆਂ ਵਿੱਚ ਸਿਰਜਨਾਤਮਕਤਾ ਦੀ ਖੋਜ ਕਰਨ ਅਤੇ ਉਸ ਨੂੰ ਹਸਤਕਾਰੀ ਕਲਾ ਵਿੱਚ ਢਾਲਣ ਲਈ ਵਿਭਾਗ ਨੂੰ ਵਧਾਈ ਦਿੱਤੀ। ਕਾਲਜ ਦੇ ਸਮੁੱਚੇ ਟੀਚਿੰਗ ਅਤੇ ਨਾਨ ਟੀਚਿੰਗ ਸਟਾਫ਼ ਨੇ ਪ੍ਰਦਰਸ਼ਨੀ ਦਾ ਦੌਰਾ ਕੀਤਾ ਅਤੇ ਵਿਦਿਆਰਥੀਆਂ ਵੱਲੋਂ ਕੀਤੇ ਕੰਮਾਂ ਦੀ ਭਰਭੂਰ ਸ਼ਲਾਘਾ ਕੀਤੀ।
